Chegarada yuk mashinalari navbati 25 kilometrga cho‘zildi
Qozog‘istonning Turkiston viloyatidagi “B. Qonisbayev” punkti yonida, O‘zbekiston bilan chegarada yuk mashinalari to‘planib qoldi. Haydovchilarning aytishicha, tirbandlik 25 kilometrga yetgan.
Haydovchilarning so‘zlariga ko‘ra, chegarada kutish ba’zan uch sutkagacha cho‘zilgan. Ular navbatning uzunligi bilan birga yo‘llarda hojatxona va oddiy maishiy sharoit yo‘qligidan ham shikoyat qilmoqda.
Davlat daromadlari qo‘mitasi (DDQ) vaziyatni yuk oqimining oshishi va elektron navbat tizimining ishlash xususiyatlari bilan bog‘lamoqda. Idoraning ma’lumotiga ko‘ra, punktning loyihaviy quvvati sutkasiga 1 ming avtomobilga mo‘ljallangan, amalda esa 1,5 ming mashinagacha xizmat ko‘rsatilmoqda.
DDQ ma’lumotlariga ko‘ra, 2026-yilning dastlabki oyi davomida chegaradagi avtomobillar oqimi 16,2 foizga oshib, 741,5 ming taga yetgan. “B. Qonisbayev” punkti orqali o‘tgan 321 ming avtomobil esa o‘tgan yilga nisbatan 21 foizga ko‘p.
Navbatning bir sababi sifatida CarGoRuxsat tizimi orqali o‘tish navbatini oldindan band qilishning sekinligi ko‘rsatilmoqda. Ayrim tashuvchilar oldindan navbatsiz kelib, uni shu yerning o‘zida rasmiylashtirayotgani sababli kutishga majbur bo‘lmoqda. DDQ ayrim haydovchilarning uzoq kutib qolishi barcha tashuvchilar bir necha sutkadan beri navbatda turganini anglatmasligini ta’kidlamoqda. Tirbandlikni kamaytirish uchun rasmiylar transportning bir qismini “Atameken – Guliston” va boshqa punktlarga yo‘naltirishni rejalashtirmoqda.
Manba: Kun.uz
