330 ta holatda sifatsiz yoqilgʻi aniqlandi, 240 tasi benzin boʻyicha
Özenergoinspeksiya 2026-yil boshidan beri 330 ta holatda sifatsiz neft mahsulotlari aniqlanganini va jami 7823 tonna mahsulot sotuvdan chetlatilganini maʼlum qildi. Ulardan 240 tasi AI-92 va AI-95 benzini bilan bogʻliq.
Inspeksiya yoqilgʻi sifati yuzasidan nazorat natijalarini 4-noyabrdagi matbuot anjumanida taqdim etdi. Tekshiruvlar yoqilgʻi quyish shoxobchalari va korxonalaridan olingan namunalar asosida oʻtkazilgan. Sotuvdan chetlatilgan 7823 tonna hajmiga faqat benzin emas, barcha aniqlangan sifatsiz neft mahsulotlari kiradi.
Inspeksiya vakili Dilshod Yakubovning aytishicha, 330 ta holatning 240 tasi benzin bilan bogʻliq boʻlib, bu holatlar AI-92 va AI-95 markalarida qayd etilgan. Biroq sifatsiz deb topilgan benzinning aniq hajmi, qaysi koʻrsatkichlar talabga javob bermagani va markalar boʻyicha taqsimot haqida maʼlumot berilmadi.
Shoxobchalarga nisbatan qanday choralar koʻrilgani va haydovchilarga yetkazilgan zarar qanday baholangani haqidagi savollarga ham aniq javob berilmadi. Inspeksiya namunalarni oʻzining laboratoriyasida yoki tegishli akkreditatsiyadan oʻtgan boshqa laboratoriyalarda tekshirish mumkinligini bildirdi.
Manba: Kun.uz
