Britaniya ukrainalik bolalardan uzr so‘radi
Britaniya hukumati ukrain tili bo‘yicha imtihon yo‘qligi sababli maktablarda rus tilini o‘rganishga majbur bo‘lgan ukrainalik qochqin bolalardan uzr so‘radi. Ta’lim vaziri 2028-yildan Angliyada ukrain tili bo‘yicha GCSE davlat imtihoni joriy etilishini e’lon qildi.
Ta’lim vaziri Jorjiya Gould ayrim maktablarda ukrainalik o‘quvchilar ukrain tilidan imtihon topshira olmagani sababli rus tilidan imtihon topshirishga majbur bo‘lganini tan oldi va bundan afsus bildirdi.
Rossiya 2022-yilda Ukrainaga keng miqyosli bosqin boshlaganidan so‘ng Britaniyaga 30 mingdan ortiq ukrainalik bola kelgan. 2024-yilda Ukraina Ta’lim vazirligi bolalarga bosim o‘tkazilayotgani yuzasidan Britaniya hukumatiga shikoyat qilgan.
Yangi imtihonni ishlab chiqish AQA tashkilotiga topshirildi, buning uchun Ta’lim vazirligi 340 ming funt sterling ajratdi. Vazir Londondagi Avliyo Mariya ukrain maktabiga tashrifi chog‘ida 20 yoshli Vitaliy Andronik bilan uchrashdi, u 15 yoshida rus tilidan imtihon topshirishga qattiq undalganini aytdi.
2024-yilda Zakarpattya viloyatidan Britaniyaga kelgan 16 yoshli Sofiya Chonka ham rus tilini o‘rganishdan bosh tortganini ma’lum qildi. Ukraina jamoat tashkilotlari 2014-yilda Rossiya Qrimni anneksiya qilganidan beri Britaniyada ukrain tili GCSE imtihonini joriy etish uchun harakat qilib kelmoqda.
Manba: Daryo
