Choy va qahva suyaklar zichligiga qanday taʼsir qiladi
Avstraliyaning Flinders universiteti olimlari 65 yoshdan oshgan qariyb 10 ming ayolni o‘n yil davomida kuzatib, choy va qahva ichishning suyak zichligiga ta’sirini o‘rgandi. Natijalarga ko‘ra, choy ichish suyaklar mustahkamligi bilan bog‘liq bo‘lishi mumkin.
Tadqiqot ishtirokchilaridan kunlik qahva va qora yoki ko‘k choy iste’moli haqida so‘ralgan, shifokorlar esa ularning son bo‘g‘imi va son suyagi bo‘yni sohasidagi suyak zichligini muntazam o‘lchab borgan.
Natijalar choy ichadigan ayollarda son suyaklari zichligi yuqoriroq ekanini ko‘rsatdi, choy finjonlari soni ortgani sari bu ko‘rsatkich ham oshgan. Kuniga ikki-uch finjon qahva esa suyak to‘qimasiga deyarli ta’sir qilmagan.
Olimlarning izohicha, choy tarkibidagi katexinlar suyak hosil qiluvchi hujayralar faoliyatini rag‘batlantiradi, qahvadagi kofein esa kalsiyning o‘zlashtirilishiga xalaqit berishi mumkin. Qahvaga sut qo‘shish bu salbiy ta’sirni kamaytiradi. Yevropada avval o‘tkazilgan tadqiqotlar ham shunga o‘xshash natijalarni bergan.
Osteoporoz suyaklarni mo‘rtlashtiradigan kasallik bo‘lib, 50 yoshdan oshgan har uch ayolning biri va har besh erkakning biridan birida uchraydi. Mualliflarning ta’kidlashicha, qahvadan butunlay voz kechish yoki ko‘p choy ichish shart emas, me’yordagi choy esa kalsiy, D vitamini va jismoniy faollikka qo‘shimcha bo‘lishi mumkin.
Manba: Daryo
