Zelenskiy Ispaniyada havo mudofaasi uchun yordam so‘radi
Ukraina prezidenti Volodimir Zelenskiy Madridda Ispaniya bosh vaziri Pedro Sançes va qirol Filipp VI bilan uchrashdi. U havo hujumidan mudofaani kuchaytirishda Ispaniya qo‘llab-quvvatlashiga umid qilayotganini bildirdi.
Zelenskiy 4-noyabr kuni kechqurun oldindan e’lon qilinmagan tashrif bilan Ispaniyaga kelgan. Ertasi kuni u Sançes va qirol bilan uchrashdi hamda Madriddagi 30-Ibero-Amerika sammitining yakuniy kunida ishtirok etdi.
Sammitda Zelenskiy Lotin Amerikasi davlatlari rahbarlarini Ukrainadagi urush, jumladan, Rossiyaning Kamishevaxaga zarbasi haqida gapirishga chaqirdi. Shuningdek, u Braziliya, Meksika, Argentina va Kolumbiyadan transformatorlar, Chilidan esa elektr kabellari yetkazib berish imkoniyatini tilga oldi.
Sançes Ukrainaga faqat Yevropa emas, dunyo davlatlari yordam berishi kerakligini ta’kidladi. Bundan oldin, 3-noyabrda Zelenskiy Berlinda kansler Fridrix Merz bilan uchrashgan va Rossiya prezidenti bilan telefon orqali emas, yuzma-yuz muzokara zarurligini aytgan edi.
Zelenskiyning Berlin va Madrid safarlari Rossiya, AQSh va Ukraina o‘rtasidagi uch tomonlama muzokaralardan bir necha kun oldin bo‘ldi. AQSh maxsus vakili Stiv Uitkoffning aytishicha, muzokaralar 10–11-noyabr kunlariga belgilangan.
Manba: Kun.uz
