Avstraliyada sumka o‘g‘risini quvgan sayyoh 5 yil 9 oyga qamaldi
Singapurlik 29 yoshli sayyoh Avstraliyada sumkasini o‘g‘irlagan shaxsni quvib, mashina bilan urgani va uning o‘limiga sabab bo‘lgani uchun G‘arbiy Avstraliya Oliy sudi tomonidan 5 yil 9 oyga ozodlikdan mahrum etildi.
Voqea 2024 yil may oyida Perth shahrida sodir bo‘lgan. Sayyoh sevgilisi va uning oilasi bilan dam olishga kelgan edi. Ijara mashinasining yukxonasidagi sumka, unda passport, iPad, naqd pul va AirTag qurilmasi bor edi, o‘g‘irlangan. Ertasi kuni AirTag orqali sumka topilgan, ammo o‘sha paytda o‘g‘ri uni elektrovelosipedda olib ketayotgan edi. Sayyoh o‘g‘rini 10 daqiqa davomida quvgan.
Maysazorda o‘g‘ri yiqilgan, keyin mashina uni urib, 25 metrga sudragan. Guvohlar baqirgach, sayyoh mashinani orqaga olib, jabrlanuvchini qutqargan va politsiyani kutgan. Biroq o‘g‘ri kasalxonada vafot etgan.
Dastlab sayyohga qasddan odam o‘ldirish ayblovi qo‘yilgan edi. Keyinchalik prokurorlar uni ehtiyotsizlik oqibatida odam o‘ldirishda ayblashgan, sudlanuvchi aybini tan olgan. Sud uning harakatini o‘zboshimchalik deb baholadi, ammo afsusini, ilgari sudlanmaganini va vahimaga tushganini hisobga oldi. Sud, shuningdek, xavfli vaziyatni aynan quvish orqali sayyohning o‘zi yuzaga keltirganini ta’kidladi. Jazo 2024 yil 24 maydan hisoblanadi, 3 yil 9 oydan keyin muddatidan oldin shartli ozod etilishi mumkin.
Manba: Daryo
