Dunyo aholisi 65 yilda 5 milliarddan ziyodga oshdi
1960–2025-yillarda Yer aholisi 3,02 milliarddan 8,2 milliardga yetdi. Oʻsish dunyo mintaqalarida bir xil boʻlmadi.
Jahon banki maʼlumotlari asosida Voronoi platformasi tayyorlagan infografika shuni koʻrsatadi: dunyo aholisi 65 yil ichida taxminan 2,7 barobar oshib, sayyoraga 5,2 milliardga yaqin odam qoʻshilgan. Infografikadagi har bir nuqta 10 million kishini bildiradi.
Mintaqalar boʻyicha oʻsish turlicha. Sahroi Kabirdan janubdagi Afrikada aholi 228 milliondan 1,32 milliardga yetib, 5,8 barobar ortgan. Janubiy Osiyoda aholi 508 milliondan 1,69 milliardga koʻpaygan, bu 3,3 barobar. Yevropa va Markaziy Osiyoda esa oʻsish atigi 1,4 barobarni tashkil etgan.
Qoʻshilgan odamlar soni boʻyicha Sharqiy Osiyo va Tinch okeani mintaqasi yetakchi: 1,04 milliarddan 2,39 milliardga, ya’ni taxminan 1,35 milliard kishiga koʻpaygan. Biroq nisbiy oʻsish 2,3 barobar, chunki bu hudud 1960-yildayoq dunyodagi eng zich aholili hudud boʻlgan.
Jahon banki 2025-yil 1-iyuldan Afgʻoniston va Pokistonni Janubiy Osiyo guruhidan Shimoliy Afrika va Yaqin Sharq guruhiga oʻtkazgan, shu sababli Janubiy Osiyo koʻrsatkichlari ularsiz hisoblangan. Lotin Amerikasi va Karib havzasida esa aholi 219 milliondan 667 millionga yetgan.
Manba: Kun.uz
