Tenerife futbolchisi o‘yindagi to‘qnashuvdan keyin vafot etdi
Ispaniyaning “Tenerife” klubi hujumchisi Xesus de Migel 3-noyabr kuni vafot etdi. U 2-noyabrdan beri kasalxonaning reanimatsiya bo‘limida hushsiz holatda edi.
Futbolchi Ispaniya ikkinchi divizionining 12-turida “Andorra”ga qarshi o‘yinda darvozabon bilan to‘qnashib, hushini yo‘qotgan. Unga tezkor tibbiy yordam ko‘rsatilgan bo‘lsa-da, yuragi ma’lum vaqt urishdan to‘xtab qolgan.
Futbolchi zudlik bilan kasalxonaga yotqizilgan. Avvalroq u mustaqil nafas olayotgani haqida xabar berilgan edi, biroq hushiga qaytmagan.
Klubning rasmiy veb-saytida xabar qilinishicha, Xesus de Migel 3-noyabr kuni soat 8:00 da vafot etgan. Futbolchi 21-sentabrda 30 yoshga to‘lgan edi.
Manba: Daryo
