Toshkentda soxta davlat raqamlari bo‘yicha sud hukmi chiqarildi
Yunusobod tumanida soxta davlat raqami va taqiqlangan maxsus moslamalari bor avtomobilni boshqargan 17 yoshli o‘smir hamda soxta raqamlarni tayyorlab sotgan Qirg‘iziston fuqarosi sudlandi. Chet el fuqarosi jarimani to‘lagach, O‘zbekiston hududidan chiqarib yuboriladi.
Yo‘l-patrul xizmati tomonidan to‘xtatilgan Malibu-2 avtomobilini ko‘zdan kechirishda unga ruxsatsiz antenna, sirena va miltillovchi chiroqlar o‘rnatilgani, old oynasi me’yordan tashqari qoraytirilgani aniqlangan. Yukxonada esa boshqa davlat raqami belgisi topilgan.
Tergov davomida ushbu shaxslar ilgari ham shunga o‘xshash huquqbuzarliklar sodir etgani ma’lum bo‘lgan. Mirzo Ulug‘bek tumanida voyaga yetmagan shaxs boshqargan Kia avtomobilida ham soxta raqamlar va shunga o‘xshash jihozlar qayd etilgan. Tekshiruvlar soxta raqamlarning chet eldan buyurtma qilib keltirilgani va sotilgani haqida ma’lumot bergan.
Sud hukmiga ko‘ra, o‘smir 6 million 600 ming so‘m miqdorida jarimaga tortilgan, unga jamoat tarbiyachisi tayinlangan. Qirg‘iziston fuqarosi Ergashov esa 66 million so‘m jarima jazosiga hukm qilingan. Jarima ijro etilgach, u O‘zbekiston hududidan chiqarib yuboriladi.
Manba: Gazeta.uz
