Diyora Keldiyorova Zagrebdagi grand-pri turnirida ishtirok etadi
Olimpiada chempioni Diyora Keldiyorova Xorvatiyaning Zagreb shahrida boʻladigan grand-pri turnirida ishtirok etadi. Bu haqda Xalqaro dzyudo federatsiyasi rasmiy saytida xabar qilindi.
Bu sportchi uchun ketma-ket uchinchi turnir boʻladi. Oldinroq u Qozogʻistonning Aqtau shahrida boʻlib oʻtgan Osiyo kubogida oltin medalni qoʻlga kiritgan. Oʻsha musobaqa Keldiyorova uchun 2024-yilgi Parij Olimpiadasidan keyingi ilk turnir edi.
Qozogʻistondagi bellashuvlarda u mahalliy sportchilar Nurayliym Sarsenbek va Gulxan Shingisxanni magʻlub etgan, finalda esa ozarbayjonlik Farida Mirzayevani muddatidan oldin taslim qilgan.
Abu-Dabidagi “Katta dubulgʻa” (Grand Slam) turnirida esa dzyudochi medal qoʻlga kirita olmagan.
Eslatib oʻtamiz, Diyora Keldiyorova 2024-yilgi Parij Olimpiadasida 52 kg vazn toifasida oltin medal sohibi boʻlgan. Shu bilan u Oʻzbekiston tarixida yozgi Olimpiada oʻyinlari chempioni boʻlgan ilk ayol sportchiga aylangan.
Manba: Daryo
