«Ўзбекнефтгаз» Saneg конларини олмаганини маълум қилди
«Ўзбекнефтгаз» Saneg компаниясининг айрим лицензиялари бекор қилинганидан кейин унинг конлари ёки улушларини олмаганини билдирди. Конларни ҳозир ким бошқараётгани ҳақида эса маълумот берилмади.
Компания вакиллари 27 октябрь куни ўтказилган матбуот анжуманида бу ҳақда гапирди. Улар Saneg «Ўзбекнефтгаз»га бўйсунмаслигини ва улар ўртасида ҳамкорлик йўқлигини таъкидлади.
Давлат активларини бошқариш агентлиги директори Соҳибжон Муродов 8 октябрда лицензияларнинг бекор қилинганини эълон қилган эди. Унинг сўзларига кўра, сабаб лицензия шартларининг бажарилмагани ва конлардан хўжалик мақсадида фойдаланилмагани бўлган. Агентлик конлар хусусий мулкка ўтказилмаганини, Saneg эса фақат ер қаъридан фойдаланиш лицензиясига эга бўлганини айтган.
Муродов бекор қилинган лицензиялар сонини, конларнинг аниқ рўйхатини ва тегишли қарор қачон қабул қилингани ҳақидаги саволларга жавоб бермади. 2019 йилда 100 дан ортиқ кон ҳукумат қарори билан «Ўзбекнефтгаз»дан Jizzakh Petroleum (ҳозирги Saneg) бошқарувига ўтказилган эди.
Manba: Gazeta.uz
